✕
Original lyrics
1 translation
Leit machet Sorge lyrics
1.
"Leit machet sorge, vil liebe wünne.
eines hübschen ritters gewan ich künde: daz
mir den benomen hânt die merker und ir nît,
des mohte mir mîn herze nie vrô werden sît."
2.
"Ich stuont mir nehtint spâte an einer zinne,
dô hôrt ich einen rîter vil wol singen in
Kürenberges wîse al ûz der menigîn. er muoz
mir diu lant rûmen, alder ich geniete mich sîn."
3.
Jô stuont ich nehtint spâte vor dînem bette,
dô getorste ich dich, vrouwe, niwet wecken.
"des gehazze got den dînen lîp! jô enwas
ich niht ein eber wilde",sô sprach daz wîp.
4.
"Swenne ich stân aleine in mînem hemede unde
ich gedenke an dich, ritter edele, sô erblüet sich
mîn varwe, als der rôse an dem dorne tuot, und
gewinnet daz herze vil manigen trûrigen muot."
5.
"Ez hât mir an dem herzen vil dicke wê getân, daz
mich des geluste, des ich niht mohte hân noch
niemer mac gewinnen. daz ist schedelîch. jône
mein ich golt noch silber: ez ist den liuten gelîch."
6.
"Ich zôch mir einen valken mêre danne ein jâr.
dô ich in gezamete, als ich in wolte hân
und ich im sîn gevidere mit golde wol bewant,
er huop sich ûf vil hôhe und vlouc in anderiu lant.
7.
Sît sach ich den valken schône vliegen.
er vuorte an sînem vuoze sîdîne riemen,
und was im sîn gevidere alrôt guldîn. got sende
si zesamene, die gelíeb wellen gerne sîn!"
8.
"Es gâtmir vonme herzen, daz ich geweine: ich
und mîn geselle müezen uns scheiden. daz
machent lügenaere. got der gebe in leit! der uns
zwei versuonde, vil wol des waere ich gemeint."
9.
Wîp vil schoene, nû var dû sam mir.
lieb unde leide daz teile ich sant dir. die wîle
unz ich daz leben hân, sô bist du mir vil liep.
wan minnest einen boesen, des engan ich dir niet.
10.
Nu brinc mir her vil balde mîn ros, mîn îsengewant,
wan ich muoz einer vrouwen rûmen diu lant,
diu wil mich des betwingen, daz ich ihr holt sî.
si muoz der mîner minne iemer darbende sîn
11.
Der tunkel sterne, der birget sich, als tuo dû,
vrouwe schoene, sô du sehest mich, sô lâ du
dîniu ougen gên an einen andern man. sôn weiz
doch lützel ieman, wiez under uns zwein ist getân.
12.
Aller wîbe wunne diu gêt noch megetîn.
als ich an sî gesende den lieben boten mîn,
jô wurbe ichz gerne selbe, waer ez ir schade niet.
in weiz, wiez ir gevalle: mir wart nie wîp als liep.
13.
Wîp unde vederspil diu werdent lîhte zam. swer
sî ze rehte lucket, sô suochent sî den man. als
warb ein schoene ritter umbe eine vrouwen guot.
als ich dar an gedenke, sô stêt wol hôhe mîn muot.
SaintMarkComments