'Alo'ofa Mai Kiate Au, E 'Otua

'Alo'ofa Mai Kiate Au, E 'Otua

'Alo'ofa mai kiate au, E 'Otua
'O fakatautau ki ho'o manava'ofa
Pea ki he fakatautau ki hono lahi 'o ho'o ngaahi 'alo'ofa 'ongongofua.
Ke ke tamate'i 'eku ngaahi 'angahala
Ke ke fufulu 'aupito 'au mei he 'eku hia
Mo fakama'a 'au mei he 'eku 'angahala
He 'oku 'ou fakamo'oni 'eku ngaahi talangata'a
Pea 'oku tu'u ma'u 'ai pe 'i hoku 'ao 'eku 'angahala
Naa ku fai 'angahala kiate koe, 'io, kiate koe pe
Pea kuou fai 'a e kovi ni 'i ho 'ao
Koe 'uhi ke tonuhia pe a koe 'oka ke ka folofola
Pea ma'oni'oni 'oka ke ka fai 'a e fakamau
Vakai, na'e fanau'i 'au 'i he 'angakovi
Pea na'e tuitui a 'eku fa'e 'iate 'au koe 'angahala
Vakai, 'oku ke finangalo ki he mo'oni 'i loto
Pea 'i he fufu te ke nga'ohi 'ai 'au keu 'ilo 'a e poto.
Ke ke fakama'a 'au 'aki 'a e 'isope, pea teu ma'a 'ai
Fufulu 'au, pea teu hinehina lahi 'i he sinou
Tuku keu fanongo ki he fiefia moe nekeneka
Ke fiemalie 'ai 'a e ngaahi hui kuo ke fesi'i
Ke ke fufu ho fofonga mei he 'eku 'angahala
Mo ke tamate'i 'eku ngaahi hia kotoa pe
Fakatupu 'iate 'au 'a e loto ma'a
Mo ke fakafo'ou 'iate 'au ha laumalie tu'u ma'u
'Oua naa ke liaki 'au mei ho 'ao
Pea 'oua naa ke to'o 'iate 'au ho laumalie ma'oni'oni
Toe 'omi kiate 'au 'a e fiefia 'o ho'o fakamo'ui
Mo ke poupou 'aki 'au ho laumalie tauataina
Pea teu 'akonaki 'aki 'a e kau talangata'a a ho ngaahi hala
Pea e liliu kiate koe 'a e kau 'angahala
Fakamo'ui 'au mei he hia 'o e toto
E 'Otua, koe 'Otua 'o 'eku moui
E hiva kalanga a hoku 'elelo 'i ho'o ma'oni'oni
E 'Eiki, ke ke fa'ai hoku loungutu
Pea e fakaha 'atu e hoku 'ngutu a ho'o fakamalo
He 'oku 'ikai te ke finangalo ki he feilaulau, koe 'uhi keu 'atu 'ia
'Oku 'ikai te ke fiemalie 'i he feilaulau tutu
Koe ngaahi feilaulau 'o e 'Otua koe laumalie mafesi
Koe loto mafesi mo mafofoa
E 'Otua, e 'ikai te ke manuki'i
Fai lelei 'i ho finangalo lelei ki Sai'one
Ke ke fokotu'u hake 'a e ngaahi a 'o Selusalema
Pea te ke fiemalie 'i he ngaahi feilaulau 'o e ma'oni'oni
Moe feilaulau tutu, moe ngaahi feilaulau tutu katoa
Pea te nau toki 'atu 'a e fanga pulu ki ho'o feilaulau'anga