‘O libbro ‘e storia ‘e fìgliemo, che ’a quinta sta’ facènno,
dice ca chistu pòpolo, cientovint’anne fa,
‘a quanno ch’era sùddeto, vulènno o nun vulènno,
na razia le facètteno, avètt’a libbertà.
Dice ca primma stévamo “oppressi dal tiranno”
e tanno spantecàvamo cercanno ll’Unità;
ca po’ nun ‘o ssapévemo e se vedètte quanno
brigante nce chiammàjeno pe ce puté sparà.
I’ sóngo pòco pràtteco, nun aggio fatto ‘a scòla,
pe chésto cumpiatìteme, nun me saccio spiecà.
Ma mo vulésse pròpeto dìcere na paròla:
luvamm’a miézo ‘e cchiàcchiare, ‘o fatto cómme sta’?
Cchiù primma, ch’èra sùddeto, nu pòvero crestiano
putéva fà na sùpplica dirètta a Sua Maestà;
macaro ‘o cuntentàvano. Mo, essèndo ch’è sovrano,
vo’ na còsa e l’arrónzano; mannaggia â libbertà!
La poesia è del 1981. Perciò indica il tempo passato dalla conquista piemontese in 120 anni.