Russia is waging a disgraceful war on Ukraine.     Stand With Ukraine!
  • Gui d'Ussel

    En tanta guisa-m men' Amors (song 3)

Share
Font size
Original

En tanta guisa-m men' Amors (song 3) lyrics

En tanta guisa-m men' Amors
C'a penas sai si dei chantar,
O si dei plangner o plorar,
Tantz mi dona gaugz e dolors!
Pero, qi-m volgues dreich jutgar,
Mais n'ai mals que bes, e majors!
Mas tant am finamen
Qe-l mal teing a nien,
E grazisc et enans
Los bes, per qe-m platz chans.
 
Bona dompna, pretz e valors,
E cortesi' ab gen parlar,
Huoill rizen, amoros e clar,
E gens cors ab frescas colors,
Et agratz,--don non avetz par,
Sobre totz autres faitz meillors,--
Vos fan entieiramen
Sobre totas valen,
Per q'ieu sui benanans
Que fui d'amor clamans.
 
Gitat m'avetz de las clamors
Ab precs et ab merce clamar,
Per qe-m devetz tener plus car,
Et fugir feignens prejadors,
C'a dompna taing ben esquivar
Lo bruit dels fals devinadors,
Que per un mal dizen
Que d'un semblan s'empren,
S'en lev' us bruitz tant grans
C'amors en sembl' engans.
 
Et es gen de dos amadors
Qan fan so qe-s taing ad amar!
Car trop pot hom amor doptar,
Si lai on blasmes e paors
Non o tol, a l'obra no par.
Que greu er de doas colors
Cors e faitz longamen.
Sabetz que vau volven
Tem que sia-l talans
Lai on es lo semblans.
 
Aisso es l'enois e-l paors
Que m'agra fait desesperar,
E partir de vos e loignar,
E virar, si pogues, aillors!
Mas tant sabetz los bens triar
Dels mals, e-ls sens de las follors,
Que aman, e temen,
E celan, e sufren,
M'en gauzirai enans
Que si n'era clamans.
 
Na Maria, soven
M'agratz a ben disen!
Mas d'altres n'i a tans
Que no-i es ops mos chans.
 

 

Gui d'Ussel: Top 3
Comments