Rita e Matteo lyrics
Sicilian
Sicilian
A
A
Rita e Matteo
✕
'Mpiciuttiedu panittieri
S'avìa fattu fidanzatu
Cu na figghia ri ghiancheri
E ci rava lu sò sciatu
Amurigghiavinu ammucciuni
Ca lu patri nun vuleva
Rita sempri a lu barcuni
Affacciata si videva
Pi viriri lu sò amuri
Nun sapeva c'avìa fari
S'affacciava a tutti l'uri
Pi putiricci parrari
Matteu travagghiava di rimpetto a Rita
E non c'era un mumento ca non si parravanu
Si parravanu a lu spissu
Li videvanu li genti
Lu sò malu ha statu chissu
Scumpareru prestamenti
Fu lu patri sapituri
Che lu nerbu a manu pigghia
Desi corpa di tutt'ura
A la matri cu la figghia
Cchiù a la figghia subbissau
Ca la Rita ni sbinìu
Sparti ancora chi pinsau
Nta na stanza la ciurìu
Lu patri, la chiave la teneva iddu
Pe purtarici iacqua e pane
Iacqua e pani pi manciari
Quannu Rita ni vuleva
'Nterra sparti lu curcari
Quantu prestu ni mureva
Idda rissi: "Pacienzia!
Comu voli lu Signuri
S'havi a fari pinitenza
S'ha suffriri pi l'amuri
Quannu l'amuri è 'nta lu cori
Nun si pò mai scurdari
Nun ci su beni e nè trisori
Ca si pò paragonari"
È proprio vero, l'amuri è na cosa ca brucia lu cori
E non si sbagghia mai nsoccu dice Rita
Rita giusto parra e dici
Ma sò patri è ustinatu
Avìa a teniri 'nfilici
Lu so cori 'namuratu
Cchiù Matteu non riggeva
Si strudeva la sò vita
E ogni notti chi faceva?
Ci cantava a la sò zita
Non t'affacci, sapuRita
Forsi, bbedda, si malata
Ma rispunni armenu, Rita
Se macari si firmata
Rita ittau un grido dispiratu
E poi scattiau a chianciri
Quannu a Matteo cchiù vicino ntisi
Quannu Rita chistu 'ntisi
Lu sò cori si rumpìu
Forti a chianciri si misi
E a Matteu arrispunnìu:
"Sugnu chiusa e 'ncatinata
Pi manciari iacqua e pani
E di cchiù gravi malata
Nun c'iagghiuornu pi dumani"
Iddu dissi: "Figghia, gioia
Lu to soffriri è pi mia
Ca to patri si fa boia
Iu ni moru appresso a tia"
Lu picciutteddu chianceva a chiantu ruttu
E Rita cu ddu chiantu agghiurnau gravi la matina
La matina, Rita chiusa
Nun si 'ntisi cchiù parrari
Era tanta pietusa
Ca la fanu cunfissari
Poi chiamaru lu dutturi
Pi luarici lu mali
Ma suffrennu pi l'amuri
Nun ci nn'è miricinali
Frati, soru, matri e amici
Cominciaru a fari vuci
Ca la povira nfilici
Dava cuntu a Cristu ncruci
C'era na prucissione di donne schette e maritate
Cu traseva e cu nisceva na dda casa
Na dda casa pari genti
Si videvanu arruvari
Rita rissi na sò menti:
"Ri st'amici chi n'à fari?
Iu ulissi a lu ma sciatu
Ca m'assisti all'agunia
Na stu piettu miu abbrazzatu
Ca murissi assemi a mia"
E lu zitu passiava
Nta so strata e 'n'arriggeva
Pi la porta s'ancugnava
E circava mi traseva
Li fimmini ca trasevano e niscevano
Dicevanu: "Sta murenno Rita"
E Matteu cercava mi traseva
Tantu fici ca trasìu
S'avvicina na lu liettu:
"Rita bedda, sugnu iu
Ca t'abbrazzu na stu pettu"
S'abbrazzarru a veru cori
Li du ziti svinturati
Iddu rissi: "Rita mori
Puru iu a l'itirnitati"
'Nta mumentu lu Matteu
Spara o patri e lu mazzau
Rissi a tutti: "C'è cchiù preiu!"
Abbrazz'a Rita e si sparau
'Nta mumentu lu Matteu
Spara o patri e lu mazzau
Rissi a tutti: "C'è cchiù preiu!"
Abbrazz'a Rita e si sparau
✕
| Thanks! ❤ |  |  |
Submitted by 
Alberto Scotti on 2023-02-24
Alberto Scotti on 2023-02-24Orazio Strano: Top 3
| 1. | La prima vinnitta |
| 2. | Ciuri di pipi missinisi |
| 3. | Comu addivintau briganti |
Comments
Music Tales
Read about music throughout history