Pensu a 'sta terra ca mi sta luntana
'Sta terra prufumata sutta 'u suli
Ca iu lassai pi jiri a travagliari
Cu gran duluri e grandi dispiaciri
Pensu a la me casuzza chi lassai
A li biddizzi di 'sta terra mia
Iu ccà li viu 'nta 'u sonnu e m'adduluru
E pensu notti e jornu di turnari
È 'na 'nfilicità luntanu stari
Luntanu di 'sta terra di Sicilia
Lassai la mamma e tutti li me cari
Lassai l'uduri di la primavera
Iu cantu pi putirimi scurdari
Ca sugnu fora di la casa mia
Cu 'stu distinu cca nun ccè chi fari
E pensu notti e jornu di turnari
Lassatimi un raggiu di lu suli
'Na guccitedda di l'azzurru mari
Lassati di la zagara l'oduri
Ca quannu tornu la vogliu truvari
È 'na 'nfilicità luntanu stari
Luntanu di 'sta terra di Sicilia
Lassai l'amuri e tutti li me cari
Lassai l'oduri di la primavera
Parole e musica di Giuseppe Nicola Ciliberto, scrittore, poeta, compositore e pittore nativo di Ribera, in Provincia di Agrigento.