Oroszország gyalázatos háborút folytat Ukrajna ellen.     Állj ki Ukrajnával!
Ossza meg
Betűméret
Eredeti dalszöveg

Lo guarracino szöveg

Lo guarracino, ca jeva pe' mare
Lle venne voglia de se 'nzorare
Se facette 'no bello vestito
De scarde de spine, pulito pulito
Co 'na parrucca tutta 'ngrifata
De ziarelle 'mbrasciolate
Co lo sciabbò, scollo e puzine
De seta 'ngrese, fina fina
 
Cu li cazune de rezza de funno
Scarpe e cazette de pelle de tunno
E sciammeria e sciammerino
D'aleghe e pile de vojo marino
Cu li buttune e buttunera
D'uocchie de purpo, secce e fere
Fibbia, spata e schiocche 'ndorate
De niro de secce e fele d'achiata
 
Doje belle cateniglie
De premmone de conchiglie
'No cappiello aggallonato
De codarino d'aluzzo salato
Tutto posema e steratiello
Jeva facenno lo sbafantiello
Girava da ccà e da llà
La 'nnammorata pe' se trovà
 
La sardella, a lo barcone
Steva sonanno lo calascione
E, a suono de trommetta
Jeva cantanno 'st'arietta:
"E llarè lo mare e lena
E la figlia d' 'a zia Lena
Ha lassato lo 'nnammorato
Pecché niente ll'ha rialato"
 
Lo guarracino, che la guardaje
De la sardella se 'nnammoraje
Se ne jette da 'na vavosa
La cchiù vecchia e maleziosa
Ll'ebbe bona rialata
Pe' mmannarle 'na 'mmasciata
La vavosa, pisse pisse
Chiatto e tunno nce lo disse
 
La sardella, ca la sentette
Rossa rossa se facette
Pe' lo scuorno ca se pigliaje
Sott'a 'nu scoglio se 'mpezzaje
Ma la vecchia de la vavosa
Subbeto disse: "Ah, schefenzosa!
De 'sta manera nun truove partito
'Nganna te resta lo marito
 
Se haje voglia de t'allocà
Tanta smorfie non haje da fà!
Fora le zeze, fora lo scuorno
Anema e core e faccia de cuorno!"
Ciò sentenno, la zia sardella
S'affacciaje a la fenestella
E fece 'n'uocchio a zennariello
A lo speruto 'nnammoratiello
 
Ma la patella, ca steva de posta
La chiammaje: "Faccia tosta
Tradetora, sbrevognata
Senza parola, male nata"
Ch'avea 'nchiantato ll'alletterato
Primmo e antico 'nnammorato
De carrera da chisto jette
E ogne cosa lle dicette
 
Quanno lo 'ntise, lo poveriello
Se lo pigliaje farfariello
Jette a la casa, s'armaje a rasulo
Se carrecaje comm'a 'no mulo
De scoppette, de spingarde
Povere, palle, stoppa e scarde
Quatto pistole e tre bajonette
Dint'a la sacca se mettette
 
'Ncopp'a li spalle sittanta pistune
Ottanta bomme e novanta cannune
E, comm'a guappo pallarino
Jeva trovanno lo guarracino
La disgrazia a chisto portaje
Ca 'mmiez'a la chiazza te lo 'ncontraje
Se ll'afferra p' 'o crovattino
E po' lle dice: "Ah malandrino!
 
Tu mme lieve la 'nnammorata
E pigliatella 'sta mazziata!"
Tuffete e taffete, a meliune
Lle deva pacchere e secozzune
Schiaffe, ponie e perepesse
Scoppolune, fecozze e conesse
Scervecchiune e sicutennosse
E ll'ammaccaje osse e pilosse
 
Venimmoncenne che a lo rommore
Pariente e amice ascettero fore
Chi co' mazze, cortielle e cortelle
Chi co' spate, spatune e spatelle
Chiste co' barre, chille co' spite
Chi co' 'ammennole e chi co' 'antrite
Chi co' tenaglie e chi co' martielle
Chi co' torrone e sosamielle
 
Patre, figlie, marite e mogliere
S'azzuffajeno comm'a fere
A meliune correvano a strisce
De 'sto partito e de chille li pisce
Che bediste de sarde e d'alose
De palaje e raje petrose
Sarache, dientece ed achiate
Scurme, tunne e alletterate
 
Pisce palumme e piscatrice
Scuorfane, cernie e alice
Mucchie, ricciole, musdee e mazzune
Stelle, aluzze e sturiune
Merluzze, ruongole e murene
Capoduoglie, orche e vallene
Capitune, auglie e arenghe
Ciefare, cuocce, tracene e tenche
 
Treglie, tremmole, trotte e tunne
Fiche, cepolle, laune e retunne
Purpe, secce e calamare
Pisce spata e stelle de mare
Pisce palummo e pisce martielle
Voccadoro e cecenielle
Capochiuove e guarracine
Cannolicchie, ostreche e angine
 
Vongole, cocciole e patelle
Piscecane e grancetielle
Marvizze, marmure e vavose
Vope prene, vedove e spose
Spinole, spuonole, sierpe e sarpe
Scauze, 'nzuoccole e co' le scarpe
Sconciglie, gammere e ragoste
Vennero 'nfino co le poste
 
Capitune, saure e anguille
Pisce gruosse e piccerille
D'ogne ceto e nazione
Tantille, tante, cchiù tante e tantone
Quanta botte, mamma mia
Ca se devano. Arrassosia!
A centenare le bbarrate
A meliune le ppetrate
 
Muorze e pizzeche a beliune
A deluvio li secozzune
Non ve dico che vivo fuoco
Ca se faceva per ogne luogo
Te - te - ttè, ccà pistolate
Ta - ta - ttà, llà scoppettate
Tu - tu - ttù, ccà li pistune
Bu - bu - bbù, llà li cannune
 
Ma de cantà sò già stracquato
E mme manca mò lo sciato
Sicché, dateme licenza
Graziosa e bella audienza!
'Nfi' ca sorchio 'na meza de seje
A la salute de luje e de leje
Ca se secca lo cannarone
Sbacantannose lo premmone
 

 

"Lo guarracino" fordításai
Rosella Caporale: Top 3
Hozzászólások