LT → German (Old High German), German (Middle High German), French (Old French) → Medieval Songs → Chevalier, Mult Estes Guariz
✕
Proofreading requested
Original lyrics
5 translations Chevalier, Mult Estes Guariz lyrics
Chevalier, mult estes guariz
quant Deu a vus fait sa clamur
des Turs e des Amoraviz
ki li unt fait tels deshenors,
cher a tort unt cez fieuz saisiz!
Bien en devums aveir dolur,
cher la fud Deu primes servi
e reconuu pur Segnuur.
Ki ore irat od Loovis
ja mar d’Enfern n’avarat pouur,
char s’alme en iert en Pareïs
od les angles nostre Segnor.
Pris est Rohais, ben le savez,
dunt Chrestïens sunt esmaïz,
les mustiers ars e desertez,
Deus n’i est mais sacrifïez.
Chivalers, cher vus purpensez?
Vus, ki d’armes estes preisez,
a Celui voz cors presentez
ki pur vus fut en cruiz drecez!
Ki ore irat od Loovis
ja mar d’Enfern n’avarat pouur,
char s’alme en iert en Pareïs
od les angles nostre Segnor.
Pernez essample a Lodevis
ki plus ad que vus n’avez:
riches reis e poëstiz,
sur tuz altres est curunez.
Deguerpit ad e vair e gris,
chastels e viles e citez,
il est turnez a Celui
ki pur nus fut en croiz penet.
Ki ore irat od Loovis
ja mar d’Enfern n’avarat pouur,
char s’alme en iert en Pareïs
od les angles nostre Segnor.
Deus livrat sun cors a Judeus
pur metre nus fors de prisun,
plaies li firent en cinc lieus
que mort suffrit e passïun.
Ore vus mande que Chaneleus
e la gent Sanguin, li felun,
mult li unt fait des vilains jeus.
Ore lur rendez lur guerredum!
Ki ore irat od Loovis
ja mar d’Enfern n’avarat pouur,
char s’alme en iert en Pareïs
od les angles nostre Segnor.
Le Filz Deus al Creatur
a Rohais estre ad mis un jorn.
La serunt salf li pecceür!
Ki bien ferrunt pur s’amur,
irunt en cel besoin servir
pur la vengance Deu furnir,
cher la fud Deu primes servi
e reconuu pur Segnuur.
Ki ore irat od Loovis
ja mar d’Enfern n’avarat pouur,
char s’alme en iert en Pareïs
od les angles nostre Segnor.
Alum conquere Moïses
ki gist el munt de Sinaï!
A Saragins ne·l laisum mais,
ne la verge dunt il partid
la Roge Mer tut ad un fais,
quant le grant Pople le seguit,
e Pharaon revint après:
el e li suon furent perit.
Ki ore irat od Loovis,
ja mar d'enfern avrat pouur,
char s'alme en iert en Pareïs,
od les angles nostre Segnor.
✕
Thanks! ❤ | ||
thanked 11 times |
Submitted by Hampsicora on 2019-06-04
Last edited by Hampsicora on 2022-01-07
Medieval Songs: Top 3
1. | Le Roi Louis |
2. | Chevalier, Mult Estes Guariz |
3. | Das Hildebrandslied |
Comments
A commented version, into modern French, can be found here